Os vindeiros días 15, 16 e 17 de novembro terá lugar en Bruxelas o encontro “LIFE in the New European Bauhaus“, organizado polo Programa LIFE, que se poderá seguir de xeito presencial ou remoto e será completamente de balde.

Este encontro ten como finalidade presentar e analizar os proxectos que están a modificar as cidades europeas para convertilas en lugares sostibles, inclusivos e máis adaptados ao cambio climático. “LIFE in the New European Bauhaus” analizará ideas tecnolóxicas que apliquen os principios da economía circular, os proxectos que preserven os ecosistemas e promovan solucións baseadas na natureza, os principios de sostibilidade aplicados ao deseño de edificios e vivendas e todas aquelas actividades que teñen como obxectivo mudar o comportamento en todos os niveis da sociedade.

Dentro das diferentes actividades plantexadas para os tres días que dura o encontro, celebrarase a palestra “Sustainable cities and districts” na que estará presente o LIFE Lugo + Biodinámico da man do seu xerente, Boris Hinojo, o martes 16 de novembro a partires das 14h30. Nela analizaranse os principios da planificación urbana sostible, a mobilidade, a xestión de residuos e a recuperación dos espazos públicos.

O Programa LIFE e o programa Horizonte 2020 son coñecidos como “A nova Bauhaus”, xa que a meirande parte dos proxectos que os conforman apostan por modificar a nosa realidade a través de enfoques multidisciplinares, para transformar os nosos costumes e con eles, mellorar o noso presente e futuro.

Todas as sesións poden seguirse, previa inscrición de balde, a través da páxina web do evento.